Unnið af Katrínu Møller Eiríksdóttur, Hvolsskóla 2005

Kynning

Margir eiga sér uppáhaldslið í einhverri íþrótt. Þeir fylgjast með hvernig liðinu gengur í keppnum og margir vita ótrúlega margt um liðsmenn og þjálfara liðsins. Heldur þú kannski með ákveðnu liði í enska boltanum? - Eða fylgist þú frekar með í körfuboltanum hér heima? Hvaða lið er í uppáhaldi hjá þér?

Í þessu verkefni átt þú að fjalla um uppáhaldsliðið þitt. Það skiptir engu hvort það er íslenskt lið eða erlent eða í hvaða grein það keppir. Þú átt að leita þér upplýsinga um liðið á Netinu. Markmiðið er að þú lærir að nota Netið til upplýsingaöflunar og setjir upplýsingarnar fram á skýran hátt.

Þið vinnið þetta verkefni saman í pörum, en skiptið með ykkur verkum (t.d. annar leitar að myndum, hinn finnur upplýsingar. Þið orðið allan texta saman og myndskreytið).

Þið eigið að
* segja frá liðinu, í hvaða íþrótt, hvaða landi og hvaða deild það keppir. Hverjir leika með liðinu og hefur það unnið eitthvað stórt nýverið?
* finna myndir af liðinu, leikmenn þess og kannski líka þjálfara eða annað sem ykkur finnst eiga við.
* svara því af hverju þetta lið er í uppáhaldi hjá ykkur.

Leitið þið upplýsinga á vefnum um íþróttaliðið. Setjið upplýsingarnar upp í Word-skjal og myndskreytið með myndum af Netinu. Athugið að skrifa með eigin orðum, þið megið ekki afrita (klippa og líma) efni af Netinu.
 

Notið leitarvélarnar á Netinu t.d. www.leit.is, www.google.com, www.altavista.com.

Sum fótboltalið eru til dæmis með eigin heimasíður:

www.manutd.is

www.liverpool.is

www.kr.is

Á leit.is má líka finna síðu með tenglum inn á heimasíður mismunandi íþróttafélaga: www.leit.is/thjon/itrottir.aspx
 

Til að vinna svona verkefni er best að fara í gegnum eftirfarandi skref:

1. Veldu þér vinnufélaga sem heldur með sama liði og þú. Athugið að þið megið ekki vera fleiri en tveir saman.

2. Veljið ykkur íþróttalið og leitið upplýsinga um það á Netinu. Gott er að vinna í tveim tölvum. Veljið myndir (athuga að vista þær rétt!!) og lesið ykkur til um það sem þið fáið að vita um liðið.

3. Skrifið texta í Word um liðið. Textinn á að þekja að minnsta kosti eina blaðsíðu (með myndum). Notið 12 punkta letur, 1,5 línubil (svertið allan textann og ýtið síðan á Ctrl + 5) og staðlaðar spássíur (ekki gera breytingar á spássíum). Þið ráðið sjálf hvaða leturgerð þið notið.

4. Myndskreytið textann með myndunum af Netinu (athugið að textinn á að vera 70% af blaðsíðunni og myndirnar 30%, annars verðið þið að bæta við blaðsíðu).

5. Neðst setjið þið slóðirnar þar sem þið funduð efnið (gott er að skrifa slóðina hjá sér, t.d. í word-skjalinu, um leið og þið finnið síðu sem þið ætlið að nota).

6. Vistið skjalið ykkar þannig að báðir aðilar eigi eintak í sinni möppu (sem sagt vista tvisvar sinnum).

7. Gerið skoðanakönnun þar sem þið kannið hvort aðrir í hópnum haldi með sama liði og þið. Setjið niðurstöðurnar upp í Excel og búið til súlurit. Vistið það skjal hjá báðum aðilum líka.

8. Sendið Excel- og Word-skjölin sem viðhengi í tölvupósti til kennarans ykkar.

Verkefnið ykkar gildir 20% af kennaraeinkunn. Þið fáið stig fyrir eftirfarandi atriði:

• Fundu upplýsingarnar á Netinu

• Uppsetning í Word (70% texti, 30% myndir) og innihald í samræmi við lýsingu í kaflanum Ferli hér að ofan

• Enginn texti klipptur beint af Netinu yfir í Word

• Lýsandi myndir

• Samvinna (verkaskipting sanngjörn, báðir aðilar fái að taka til máls)

• Skjöl eru vistuð rétt hjá báðum aðilum

• Excel- og Word-skjölin voru send sem viðhengi í tölvupósti til kennara

Hver og einn verður metinn einstaklingslega þannig að tveir aðilar innan sama hóps geta fengið ólíka einkunn.
 

Nú ertu vonandi búin(n) að fræðast um íþróttalið um leið og þú hefur æft þig í að nota Netið til upplýsingaöflunar. Netið er stór miðill sem inniheldur mikið af upplýsingum um ótrúlega margt milli himins og jarðar. Næst þegar þig vantar að vita eitthvað um eitthvað getur þú prófað að finna það á vefnum.

Gert 13. september 2005.
Salvör Gissurardóttir þýddi þetta snið frá The Webquest Page.