Unnið af Katrínu Møller Eiríksdóttur, Hvolsskóla 2005

Kynning

Áttu uppáhaldshljómsveit? Hver er hún? Hvaða tónlist spilar hún og hvaðan koma meðlimir hennar? Flestir eiga sér uppáhaldslag og uppáhaldshljómsveit.

Í þessu verkefni átt þú að fjalla um uppáhaldshljómsveitina þína og leita þér upplýsinga um hana á Netinu. Markmiðið er að þú lærir að nota Netið til upplýsingaöflunar og setjir upplýsingarnar fram á skýran hátt.

Byrjaðu á að finna þér vinnufélaga, sem hefur sama tónlistarsmekk og þú. Þið vinnið þetta verkefni saman, en skiptið með ykkur verkum (t.d. annar leitar að myndum, hinn finnur upplýsingar. Þið orðið allan texta saman og myndskreytið).

Þið eigið að
* lýsa hljómsveitinni (hvað heitir hún, hvaðan kemur hún, hvers konar tónlist spilar hún o.s.frv.),
* finna myndir af henni
* svara því af hverju þessi hljómsveit er í uppáhaldi hjá ykkur.

Leitið þið upplýsinga á vefnum um hljómsveitina. Setjið upplýsingarnar upp í Word-skjal og myndskreytið með myndum af Netinu. Athugið að skrifa með eigin orðum, þið megið ekki afrita (klippa og líma) efni af Netinu.
 

Notið leitarvélarnar á Netinu t.d. www.leit.is, www.google.com, www.altavista.com.

Skrifið inn leitarorð (stundum verður það að vera á ensku), skoðið síðurnar sem upp koma og veljið úr. Ef hljómsveitin er erlend gætuð þið þurft að lesa töluvert á ensku.
 

Til að vinna svona verkefni er best að fara í gegnum eftirfarandi skref:

1. Veldu þér vinnufélaga sem hefur sama tónlistarsmekk og þú. Athugið að þið megið ekki vera fleiri en tveir saman.

2. Veljið ykkur hljómsveit og leitið upplýsinga um hana á Netinu. Gott er að vinna í tveim tölvum. Veljið myndir (athuga að vista þær rétt!!) og lesið ykkur til um það sem þið fáið að vita um hana.

3. Skrifið texta í Word um hljómsveitina. Textinn á að þekja að minnsta kosti eina blaðsíðu (með myndum). Notið 12 punkta letur, 1,5 línubil (svertið allan textann og ýtið síðan á Ctrl + 5) og staðlaðar spássíur (ekki gera breytingar á spássíum). Þið ráðið sjálf hvaða leturgerð þið notið.

4. Myndskreytið textann með myndunum af Netinu (athugið að textinn á að vera 70% af blaðsíðunni og myndirnar 30%, annars verðið þið að bæta við blaðsíðu).

5. Neðst setjið þið slóðirnar þar sem þið funduð efnið (gott er að skrifa slóðina hjá sér, t.d. í word-skjalinu, um leið og maður finnur efni sem maður ætlar að nota af síðunni).

6. Vistið skjalið ykkar þannig að báðir aðilar eigi eintak í sinni möppu (sem sagt vista tvisvar sinnum).

7. Gerið skoðanakönnun þar sem þið kannið hvort aðrir í hópnum hafi sömu uppáhaldshljómsveit og þið. Setjið niðurstöðurnar upp í Excel og búið til súlurit. Vistið það skjal hjá báðum aðilum líka.

8. Sendið Excel- og Word-skjölin sem viðhengi í tölvupósti til kennarans ykkar.

Verkefnið ykkar gildir 20% af kennaraeinkunn. Þið fáið stig fyrir eftirfarandi atriði:

• Fundu upplýsingarnar á Netinu

• Uppsetning í Word (70% texti, 30% myndir) og innihald í samræmi við lýsingu í kaflanum Ferli hér að ofan

• Enginn texti klipptur beint af Netinu yfir í Word

• Lýsandi myndir

• Samvinna (verkaskipting sanngjörn, báðir aðilar fái að taka til máls)

• Skjöl eru vistuð rétt hjá báðum aðilum

• Excel- og Word-skjölin voru send sem viðhengi í tölvupósti til kennara

Hver og einn verður metinn einstaklingslega þannig að tveir aðilar innan sama hóps geta fengið ólíka einkunn.
 

Nú ertu vonandi búin(n) að fræðast um hljómsveitna þína um leið og þú hefur æft þig í að nota Netið til upplýsingaöflunar. Netið er stór miðill sem inniheldur mikið af upplýsingum um ótrúlega margt milli himins og jarðar. Næst þegar þig vantar að vita eitthvað um eitthvað getur þú prófað að finna það á vefnum.

Gert 13. september 2005.
Salvör Gissurardóttir þýddi þetta snið frá The Webquest Page.